தமிழ் உறவுகளே!

இலங்கைத் தமிழருக்காக போராடவேண்டும் என்ற கருத்தில் எந்த மாற்றுக் கருத்தும் இல்லைத்தான். ஆனால், இங்கு இன்னுமொரு விடயத்தையும் கருத்தில் கொள்ளவேண்டும்.

போராட்டம் என்றுகொண்டு பொது மக்களின் அதிருப்தியை நாம் பெற்றோமேயானால் நாம் தலையாலே கிடங்கு கிண்டினாலும் எதுவுமே நடைபெறப் போவதில்லை என்பதை ஞாபகத்தில் கொள்ள வேண்டும்.

கூச்சலும், குளப்பமும் எல்லா இடங்கள்ளுக்கும் பொருந்தாது. ஆடுகின்ற மாட்டை ஆடிக்கறக்க வேண்டும், பாடுகின்ற மாட்டை பாடிக்கறக்க வேண்டும்.

சாலை மறியல் போராட்டத்தில் என்னென்ன பின் விழைவுகள் வரும் என்பதையும் நாம் நன்கு கவனதில் கொள்ள வேண்டும்.

பொதுவாக இந்த மாதிரி வேளைகளில் பொதுமக்கள் பாரிய இன்னல்களுக்கு உள்ளாவதை காணக்கூடியதாக இருக்கின்றது.

உதாரணத்திற்கு:- ஒருவர் இதனால் தனது விமானத்தையோ, ரயிலையோ, தொலைதூரத்திற்கு செல்லும் பஸ்ஸையோ தவற விட்டால் அல்லது தலைபோகிற அவசரமான  வேலையை  தவறவிட்டால்  அவருக்கு என்ன மாதிரியான மன நிலை எம்மீது ஏற்படும்?

அவசரமாக வைத்தியசாலைக்குச் செல்லும் வயோதிபர், கர்ப்பிணி பெண், கைக்குழந்தைகள்… இவர்களுக்கு ஒன்று நடத்துவிட்டால் அதையே இங்குள்ள மீடியாக்கள் திரும்ப திரும்ப போட்டுக்காட்டி எம் மக்களின் மேல் காழ்ப்புணர்ச்சியையே ஏற்படுத்திவிடுவார்கள்.

எம் போராட்டம் என்பது வேற்று இன மக்களின் சினத்தையும், அசெளகரிகத்தையும் உண்டு பண்ணுவது போல் அமைந்து விடாமல் இருக்கும்படி பார்த்துக் கொள்ள வேண்டும்.

சில வருடங்களுக்கு முன் Queens Parkகில் நடைபெற்ற ஒன்று கூடலின் பின் அங்கு எம்மக்கள் போட்டுச்சென்ற தண்ணீர் போத்தல்களையும், குப்பைகளையும் திரும்பத்திரும்ப ஒரு தொலைக்காட்சி காட்டி, எம் மானத்தை வாங்கியது அனைவருக்கும்  ஞாபகத்தில் இருக்கும் என நம்புகின்றேன்.

அதேவேளை சில மாதங்களுக்குமுன் நடைபெற்ற மனிதச்சங்கிலி போராட்டத்தில் நாம் ஒழுக்கமாகவும், பண்பாகவும் நடந்து கொண்டதாக அதே தோலைக்காட்சி திரும்பத்திரும்பவும் எமக்கு கெளரவம் ஏற்படும் படியும் சொல்லியது!

இந்த இரண்டுக்குமான காரணம் எமது செயலின் பிரதிபலிப்புத்தான்.

Torontoவில் மனிதச்சங்கிலியின் போது எமக்கு எதிரான வாசகங்களை எமது கழுத்திலேயே தொங்கப்போட்ட சாணக்கியர்களை யாரும் மறந்து இருக்க மாட்டீர்கள்.

எமக்கு ஒரு கெட்டபெயரை ஏற்படுத்தவென்றே சிலர் புத்திசாலித்தனமாக காயை நகர்த்த, அதை மந்தைபோல் நாமும் பின்பற்றி, சட்டம் ஒழுங்கிற்கு குந்தகம் விழைவிக்கும் படி நடந்துகொண்டால் எம்மைவிட ஏமாளிகள், கோமாளிகள் யாரும் இருக்கமாட்டார்கள்.

போராட்டம் வேண்டும்தான்!

இந்த நாட்டு மக்கள் மெச்சும் வண்ணம் எங்கள் போராட்டம் இருக்க வேண்டும். பொலிசாரும், அரசியல் வாதிகளும்,  மீடியாக்களும்  எம் திடத்தையும், ஒற்றுமையையும் புருவத்தை உயர்த்தி பார்க்கும் படி எமது போராட்டங்கள் அமைய வேண்டும். பலமுள்ளவார்கள் எம் தலையை வருடும் படி பார்த்துக்கொள்ள வேண்டும். அதைவிடுத்து அவர்கள் எமக்கு குட்ட வெளிக்கிட்டால் நாம் இனியும் ஓட இன்னும் ஒரு நாடு இந்த உலகத்தில் இல்லை!

Ottawa Citizen என்னும் நாழிதலில் இந்த விடயம் பற்றி வந்த மக்களின் மனப்பான்மைகளை மக்களே எழுதிய மடலைப் பார்வையிட இங்கு கிளிக் பண்ணுங்கள்

சரி உங்கள் கருத்து என்ன என்று ஒருதரம் வாக்களித்துவிட்டு செல்லுங்களேன்…