சிரிப்பாகவும், சிந்திக்கும் படியாகவும் கதைகள் சொல்லிவந்த ஒரு கலைஞர் தான் தென்கச்சி கோ. சுவாமிநாதன்

சன் தொலைக்காட்சி, சென்னை வானொலி போன்றவற்றில் 14 ஆண்டுகள் தொடர்ந்து ஒலிபரப்பான “இன்று ஒரு தகவல்” மூலம் லட்சோப லட்சம் நேயர்களின் இதயத்தில் நீங்கா இடம் பெற்ற தென்கச்சி கோ. சுவாமிநாதன் (63) மாரடைப்பால் இன்று காலமானார்.

இந்தியாவில் இருந்த காலங்க்களில், வானொலியில் காலை 6.30 மணியளவில் தென்கச்சியின் குரலை எதிர்பார்த்து காத்திருந்தவர்களில் நானும் ஒருவன்.

அவருக்கு மனைவியும் மகளும் உண்டு.

வேளாண்மைப் பட்டதாரியான சுவாமிநாதன், தமிழ்நாடு அரசுப் பணியில் விவசாய அலுவலராக வாழ்க்கையைத் தொடங்கினார். அரியலூர் மாவட்டம் தென்கச்சிப்பெருமாள் நத்தம் என்ற ஊரில் பிறந்ததால் அந்த ஊரின் பெயரைச் சுருக்கி “தென்கச்சி’ என்று அழைக்கப்படலானார்.

1977 முதல் 1984 வரை திருநெல்வேலி வானொலி நிலையத்தின் பண்ணை இல்ல ஒலிபரப்புப் பிரிவில் உதவி ஆசிரியராகப் பணியாற்றினார். பின்னர் ஆசிரியராகி சென்னைக்கு வந்தார். பிறகு உதவி இயக்குநராக பணி ஓய்வு பெற்றார்.

சிறந்த எழுத்தாளராகவும், நகைச்சுவைப் பேச்சாளராகவும் திகழ்ந்த அவர் நல்ல சிந்தனையாளர். அவருடைய ஊரின் ஊராட்சி மன்றத் தலைவராகவும் பதவி வகித்திருக்கிறார். பல நூல்களையும் எழுதியிருக்கிறார்.

அன்னாரின் ஆத்மா சாந்தியடைய அனைவருக்கும் பொதுவான வல்லமைமிக்க இறைவனைப் பிராத்திக்கிறோம்