கனடாவின் முதல் தமிழ் பாராளமன்ற உறுப்பினர்

நேற்று நடந்து முடிந்த கனடிய பாராளமன்றத் தேர்தல் கனடா வரலாற்றில் பல முக்கிய மாற்றங்களைத் தந்த தேர்தலாகும். கனடாவில் கண்கூடாக நான் நேரில் பார்க்கும் முதல் தேர்தலும் இதுவே ஆகும். கனடா முழுதும் இருக்கும் சுமார் 308 தொகுதிகளுக்கு நடந்த இத்தேர்தல் கனடா வாழ் தமிழர்களுக்கும் முக்கியமான ஒரு தேர்தலாக அமையும். ஆம் ! கனடா வரலாற்றிலயே முதன்முறையாக ஒரு தமிழர் பாராளமன்றம் செல்லவிருக்கின்றார். மேற்கு உலகிலயே பாராளமன்றம் செல்லும் முதல் தமிழரும் இவர் தான் என்பதும் இங்கு குறிப்பிடத்தக்கது.

கனடா Scarborough- Rouge River தொகுதியில் புதிய ஜனநாயக கட்சியின் (NDP)  சார்பாகப் போட்டியிட்ட ராதிகா சிற்சபேசன் என்னும் 29 வயது இலங்கை வம்சாவளித் தமிழர் கனடாவின் வரலாற்றிலயே முதன்முறையாக பாராளமன்றம் செல்லும் முதல் தமிழர் என்ற பெருமையைப் பெற்றார்.

தெற்காசிய வம்சாவளியினர் மற்றும் சீன வம்சாவளியினர் அதிகம் வசிக்கும் ஸ்காபுறோ ரூஜ் ரிவர் தொகுதியில் கடந்த 23 ஆண்டுகளாக லிபரல் ( தாரளமயக் ) கட்சியின் டெரக் லீ உறுப்பினராக இருந்து வந்தார். ஆனால் இம்முறை அவர் ஓய்வுப் பெற்ற பின்னர் போட்டியிட்ட அனைத்து வேட்பாளர்களும் தெற்காசிய வம்சாவளியினராக இருந்தனர். இவற்றில் கன்சவேர்டிவ் கட்சியின் சார்பாக மார்லின் காலியட், லிபரல் கட்சியின் சார்பாக ராணா சர்கார், புதிய ஜனநாயகக் கட்சியின் சார்பாக ராதிகா சிற்சபேசன், பசுமைக் கட்சியின் சார்பாக ஜார்ஜ் சிங் ஆகியோர் போட்டியிட்டனர்.

ஆனால் ராதிகா சிற்சபேசன் வெற்றிப் பெற்று முதல் தமிழர், முதல் தமிழ் பெண் பாராளமன்ற உறுப்பினர் என்ற பெருமையைத் தட்டிச் சென்றார். 29 வயதே நிரம்பிய ராதிகா பாரளமன்றத்தில் தமிழர்களின் குரலைப் பிரதிபலிப்பார் என அனைவரும் எதிர்ப்பார்க்கின்றனர்.

ராதிகா சிற்சபேசன் நீண்டகாலமாக கனடாவில் வசித்து வந்தவர் என்பதாலும், தமிழர் மற்றும் தமிழர் அல்லாதோரிடம் எவ்வித அரசியல் பிரச்சனை இல்லாமல் நகர முடிந்தது எனலாம். அவர் வெளிப்படையாக புலி ஆதரவாளராகவோ, புலி எதிர்ப்பாளராகவோ செயல்பட்டவர் இல்லை. அதே சமயம் தமிழர்கள், தமிழர்கள் நலன்களுக்கு ஆதரவாக செயல்பட்டவர். இது அவருக்கு நற்பயனாய் அமைந்தது. என்றும் இல்லாத அளவுக்கு புதிய ஜனநாயகக் கட்சிக்கு நாடு முழுதும் ஏற்பட்ட ஆதரவு அலையும் இவருக்கு கூடுதல் பயனாக அமைந்தது எனலாம்.

கனடியத் தமிழர்கள் தமது வாழ்வை கனடாவில் வளப்படுத்தவும் தாயக நாட்டில் உள்ள மக்களின் உரிமைக்காக பாடுபடவும் கறையில்லாத, பக்குவமான, ஆழமான சிந்தனையுடன் செயல்படுவதே வெற்றியளிக்கும். அந்த வகையில் ராதிகா சரியான நபரே எனத் தோன்றுகின்றது. எது எப்படியானாலும் முதன்முறையாக வட அமெரிக்க நாட்டில் தமிழர் ஒருவர் பாராளமன்றம் செல்கின்றார் என்பது உலகத் தமிழர் அனைவருக்கும் பெருமையான செய்தியாகும். எந்தவிதக் கறையும் இல்லாமல், இளமையும் பொறுமையும் திறமையும் கொண்ட ராதிகாவின் அரசியல் பயணத்துக்கு எமது நல்வாழ்த்துக்கள். தமிழர் மற்றும் தமிழர் அல்லாத கனடா வாழ் மக்களிடையே நற்பணி செய்யவும், பல சாதனைகள் புரியவும் வாழ்த்துவோமாக.

தமிழர்கள் பாராளமன்றத்தில் உறுப்பினராக இருக்கும் பிற நாடுகள் இந்தியா, இலங்கை, மலேசியா, சிங்கப்பூர், தென்னாப்பிரிக்கா, பிரான்சு, மொரிசியஸ் ஆகும். இந்த வரிசையில் கனடாவும் இணைந்துள்ளது. கனடாவில் தமிழர் ஒருவர் பாராளமன்ற உறுப்பினராக ஆகி இருப்பது, நிச்சயம் இலங்கை அரசுக்கு மேலும் கடுப்பைக் கிளப்பி இருக்கும் என்றால் அது மிகையாகாது.

Advertisements